最後的工作日敲定　我可以唔撈嗎 48

終於等到工作日程表！

六月１８日將會係小弟最後一個工作日。
六月２３將會同朋友（現實生活果Ｄ）影下相，留個念。
剩番最後一星期，用黎清場，足夠有餘。


我刻意安排下，最唔太想見到個Ｄ客人，應該唔駛等到六月，五月一完就可以唔炒比佢地食。

其實工作一路以黎好輕鬆，真係從來無辛苦過無受過氣，有時仲有意想不到的尊重（個人認為同敬業精神有關）。只不過，好客之中，都有無咁好的。咁一圍食客入面，一個半個衰的，就會令我唔想做，自己生意０既好處，就係想點就點，無理由要忍。


１清理一個多年無開過０既儲物格，入面有好多野掉，同埋有我十年前出０既工具書，要拎番番屋企，留個紀念。

２高達波子機。。。要賣走

３一堆未砌模型，要ＧＯＧＯＶＡＮ回家

記底完六月份工作後，個人停低左落黎，原來真係眨下眼咁快就到呢一日。

有冇唔捨得？一定有，不過，呢個係另一個開始，而非終結。今次０既人生路，同讀書、工作不同，至少，無乜人可以跟，無乜路可以參考。

我問老婆，駛唔駛續多九個月租約等埋佢。。。哈哈。


回想當初搬過黎（２０１２年一月），應該係股票期權災難日之後無耐，錢又唔係無，不過就重傷。。。

首次獨資經營，當然係搏老命啦，首月已經衝過六位數收入，唔記得邊一兩年，係有二十個／月。。。

租金升幅由２０１１一月年到２０１９年六月，七年半間，租金只係多左２５％，但鋪位已被易手多次。老實講，我只係要間鋪四四方方，位置唔太差便ＯＫ，呢Ｄ要求好多地方都有。

裝修連基本設備，都係七萬幾，攤分番每年，都係一萬／年。

如無意外，六月收入只能應付當月家庭及生活開支。即七月開始，要食老本了。


小弟2001年畢業，走到２０１９年，終於都完成工作搵食人生階段，可以全職做番自己。

今年未夠４０，可以退下火線，我希望係退下搵錢相關事情（即係唔再搵錢），而非退下現時工作去做其他工作，咁做對我來說無意思，更是浪費多年安排。好多人攪錯兩者意思，我係唔想搵錢，並非只係唔做現工作咁簡單。更加唔會去開投資班收錢。。。想學，大家睇我個ＹＯＵＴＵＢＥ　ＣＨＡＮＮＥＬ啦！

ＷＨＡＴＳＡＰＰ　ＧＲＯＵＰ中，有朋友叫我去飲下早茶／睇下早場電影，其實我唔係想要呢Ｄ！呢幾年工作上左軌道，其實我已經好清閒，尤其呢幾個月，我為左適應一下，都已經放假時日日出街行（每個星期一、四、五），其實係幾悶的，食都食唔到咁多，買野都係有限數。


所以，才會去申請ＰＯＬＹＵ圖書証，同埋ＪＯＩＮ　Ｔ　ＨＯＢＢＹ　個噴油場。

寫ＢＬＯＧ，寫書，拍片，砌高達，暫時會係首年財自過日晨活動，仲有要同小女上暑期班預習，睇下又如何！

寫ＢＬＯＧ，繼續現時方針。

寫書，應該不太多投資相關，反而同工作有關，或許需要自資。

拍片，投資為先，高達次之，再另有一個題材，要等我真係脫離左工作先拍，為左滲入另一年齡層，早有預備。

以上三個做唔到，都唔緊要，最重要係，要幫十個月後財自０既太太諗下佢可以做Ｄ乜。

最後最後，財務上呢，為左要補番大約１８萬／年既收入缺口，似乎要再投資多少少（三球，六厘），近日跌市，可能係一個好機會。