我家的窮人理財（一）

今日係術後一星期，首次出街。

亦係財自後一個月，現時感覺良好，無悶，無９流流，無覺得自己係零０既感覺。自然醒我從來有冇工作都係咁，反而現在每日訓醒先諗做乜，以前係無既。

長期屈係屋企，真係唔係好得，強制行街／運動係必需的。

過左七月，開始無人同我食"退休飯"，或者咁講，我係術前一早預約食哂了。


之前係書局，見到＜＜窮家有道 - 窮一生＞＞呢本書，好快打左一次書釘，條友講野都幾抵死，而佢對儲錢觀念，簡單得黎又唔係個Ｄ勁逼迫你做苦行憎個種。


可惜，係我第二次打書釘時，我已經好快睇哂佢本書，正常一本書我好少再重睇，所以買左番屋企都係放係度，唔好意思，我會選擇放盒未砌０既高達。

不過，都在此推介一下，買番書閒時閱讀也ＯＫ。（我唔識佢架！若佢見到，主動識下我吧，哈。。。）至少，好少書會令我行入書局特登去搵佢睇多次。

睇黎佢係好近９０後０既８０後；我，係好近８０後０既７０後。

窮，係無分年代。

唔鐘意自己個老細，亦都係千古不變。

我唔知佢有冇樓，不過萬丈高樓從地起，就對所有窮青年都一樣。

順手人卦ＧＯＯＧＬＥ下，ＦＢ　ＬＩＫＥ係我六倍，被動收入當然我多佢少少啦。。。

入正題，講窮，我有另一番見解。

******

小弟母親極慳，如果佢後生番四十年（佢已不在人間架喇），可能已經可以開班教人慳錢（唔係食過期面包皮／要準確至角分豪咁紀錄每日開支）。。。同時，我個不知所謂老豆係病態賭徒，份糧係比哂澳門同馬會０既。

簡單Ｄ講，就係我阿媽養起頭家，唔駛養埋另一半已經萬幸。

咁我童年？都仲可以有零用錢買高達，應該還不太差（也謝謝政府公屋，書薄律貼我老豆話煩唔Ｌ申請，亦可能申唔到。。。但佢賭哂份糧）。讀大學我都無申請ＧＲＡＮＴ　ＬＯＡＮ，因為我媽有定期存款唔想曝露，因我老豆會謀住，再去借錢賭。。。

我唔知我呢Ｄ叫唔叫少年窮，不過認真無乜捱過真窮滋味，應該全要歸功我阿媽。

大學學費都係佢比，生活費我有做下補習，可以靠自己。

屈指一算，佢走後一計，應該成世人儲左一百萬。。。


一個月幾千蚊人工，點儲到咁多錢？到而家都係個迷。

另外，呢十幾年我比佢０既家用，佢其實用得好小部份（我唔算比得多，只係低５位數），佢將我比佢大部份都儲起左。因為我好多時都係將收番黎既現金再比佢，大部份現金都好新淨（唔好再估我做乜，ＰＬＥＡＳＥ）！

老人家既野，我控制唔到亦都改唔到，只能提醒自己，錢再多，儲黎比下一代都無用，倒不如駛左佢，為人子女的，家用都係想佢用哂，做個老人月光族。

兒孫自有兒孫福，係咪？

亦因知識所限，同時唔可以比個賭徒老公知佢Ｄ錢，佢只有做現金定期，定期Ｄ單放哂係保險箱。如果佢拎呢舊錢去買樓／月供買匯豐／中電，可能又係另一故事了。

都係個句，慳錢同早日投資，係財務自由同買回自己０既不二法門。收入少的，要投資；收入多的，更加要投資。如果我當初無投資（雖然成績好一般），面對能力下降之時，心理同收入可能都會做成不少壓力。（不過我係高位光榮引退０既！哈哈。。。）

仔女生唔生性，呢Ｄ就真係睇命水了。