馬雲好介紹　我可以唔撈嗎 38

離唔撈之日重有４２５日。

呢個月過得又係好快，工作唔忙，但湊仔忙。

同埋，多左工人後，生活質素提升左唔少，而家餐餐（包括中午）有魚有肉有菜仲有飯後果！真係均衡飲食我做到。


另外，小朋友早左訓，同老婆不停睇戲！（我地用ＮＥＴＦＬＩＸ，或者ＣＳＬ　ＰＬＡＮ　ＨＭＶＯＤ，真係想睇高清，就要ＢＴ了！）

為免嘈到出面，通常都係廳細聲聽。感謝馬雲帶來呢件東西：

結果，插呢舊野入電視，兩公婆帶住藍牙耳機聽，同埋佢有雙頻道藍芽，可以同時配對兩個耳機，正呀！我係用AfterShokz Trekz Titanium，可以一邊聽一邊傾計！骨傳導耳機呀！（八百幾，香港買啦，唔係馬雲！）


另外，仲有呢件。。。唔駛用電！可以安係水龍頭０既沖涼水溫溫度計。



從此家姐識自己較溫度，工人同細佬沖涼唔駛估估下。水力自動發電唔駛入電。淘寶人仔＄６９，不過驚會爆炸就唔好試了。

另，買左呢兩件比女主人。有冇同好識哂三支杖０既名？

講工作

男主人工作都係好嘆，無特別事。反而女主人係供應鍊同員工人手有重大轉變。

舊運輸成日蝦女主人份人無所謂，價錢唔好之餘又成日排到佢優先序最後。其實女主人都應該算係佢大客，估計佔佢生意兩三成以上無走雞。轉左運輸後，仲反過來鬧人，算係乜道理？

另員工呢，幾年來生左三個小朋友。真係唔知邊個著數邊個唔著數了，我諗除左政府工，真係有冇邊間可以比你咁樣生法？

另文再述啦。。。

講投資

本月無買入任何股票，只有ＲＯＬＬ　ＯＶＥＲ　期權或者開新倉。

女主人隻ＨＳＢＣ升到７８了，如六月收低於８２.５，佢就全袋權金了。

利是基金ＨＳＢＣ如五月升到８０，就要交貨。

仲有ＡＥＫ，買左以來，一次息都未收，佢就要贖回！！！結果帶來七千港元虧損。。。

講資產

女主人上月４６９萬，本月為４８５萬。多左１６萬，一來係入票（佢份人工）時間不同，二來上月匯控是虧損而本月匯控有盈利。（計番數，十二個月平均每月＄１０６０００淨增長）

男主人上月２９０萬，本月為２９８萬。只多左８萬，原因係非建行部份錄得虧蝕，而之前大升０既ＡＴＶＩ　打回原形。（計番數，有紀錄後，７個月平均每月＄１２８０００淨增長，如果唔係賺息蝕價，增幅應該更多。）

離唔撈之日重有４２５日。期待單一建行表現令財自之路更順暢，雖然即使刻下停工唔做都可以夠食夠洗。但呢一年工作加埋女主人個筆，能夠於跌市時提供足夠緩衝，又或者提供執死雞機會。

真係升到十蚊？即時賣左佢，零借貸下買入其他收息產品，令利息收入同現在一樣。貪心Ｄ，升到１１蚊，捐一百萬出黎（已問准女主人，認真的！）。後備貸款額就變成執死雞基金了。