叻極都係一層屯門舊樓　HIBOR急升

唔否認如果買黎投資增值，錯過左就係錯過左。投資物一升，好難買得番。

我知道，亦明白，住屋係必需品。如果唔買，一路交租，感覺虛耗。

可能你話，可以加按套現，咁其實係借錢，都係要還０既。樓按只係提供左一個比較低息槓桿你去再投資。

至於你再買其他樓又再等升值，又係另一故事。錢最終都要還，你一日未清，收到０既租金都係要用黎還供款。

上面個堆其實係廢話，因為有千千萬萬個＂例子＂可以推番我０既論點。

呢位大同，應該買左望到海０既單位，睇中原成交，而家最貴都只係６００萬。

６００萬應該係我住緊果度，連兇宅＋最細都買唔到。。。

今日陪老婆去萬寧買野果陣，同佢講過上面個ＣＡＳＥ，其實男主人個區，最差０既屋苑Ｄ，比你升到五球或者升到一千萬，如果自住，都係一樣又細又舊又爛，你唔搬的話，生活質素係唔會提升。

樓價易睇，唔買樓都可以有個概念。租金無乜人會日日睇月月睇，升左幾多？

男主人個區分四類私樓ＡＢＣＤ。屋苑Ａ細單位已迫近千萬，男主人２００９年住屋苑Ｂ１，現在住屋苑Ｂ２。理論上係同級（Ｂ１位置方便打工仔，Ｂ２四方夠大仲有算幾大０既私人公園＋草地），由２００９至２０１８租金未升夠一倍，我唔知打工人工可以升多少，不過十年間若有以下條件，租金升幅其實唔算好困擾

同女主人行到咁上下，我打左個比喻。

屋企有隻百獸王ＧＸ合金，女主人生日買比我，入手價２２００，而家４０００都黎緊。我一路無開盒玩，但佢升左對我黎講又無用，都係合金模型一盒。

女主人話我錯哂，因為樓要用黎住，玩具唔係。又０岩喎！

＂早買早享受＂

呢句每次聽親都想笑！

因為呢句係賣玩具維生０既哈比人金句之一！！佢建議人買玩具，早買早享受，遲買即使平左都要慢慢等喎！佢又唔知其實好多玩具玩家，係好多盒未開０既，排隊都未玩得切，何來早買早享受？

哈比人係邊個？可睇以下連結

＜心態決定境界 尖酸刻簿哈比人＞

同樣地，若然早買一層屈就自己０既樓，真係早買早屈就！倒不如花多少少錢係租金之上住好Ｄ吧，好歹大同兩公婆都係專業人士呀！

折衷辦法？就係做雙租族，自己個間放租，補貼自己住間好Ｄ！拿，咁就唔係增加現金流方法喇，慣左死慳死抵０既低級收租仔未必會咁做０既。。。

戴番個頭盔先！風中追風兄講過，如果收入唔太高，但又入唔到政府安全網個Ｄ，早日上車可以對沖租金上升風險。每個家庭情況唔同收入唔同風險胃納都唔同，我只係用我兩個大同０既情況黎講，以佢地收入同能力（可能仲有得升架！），買左間質素唔高０既細單位黎住，屈就唔在講，仲沾沾自喜覺得自己早左上車，其實都係傻。（我又唔會恥笑佢，因為呢個年代呢個學科呢個職業０既人，都好安份守紀，人生如打ＲＰＧ，日磨夜磨儲經驗升ＬＥＶＥＬ等爆機。。。係唔會好似我呢Ｄ一畢業就放棄自己專業０既人咁癲狂）

如果我做番大學個行，而我老婆女主人一路都係做個秘書仔，我估我會住係屋苑Ｃ慢慢供完佢就算。以我能力唔高之下，我估家庭收入都係得５萬，無錢無ＳＡＹ，唯有做羊群跟下大隊，至少有得圍爐最下暖。。。

但係，咁樣我叻極咪又係住得係屋苑Ｃ！！升左間屋係唔會靚左０既。。。

******

篇文其實打好左兩個星期，今日我又不妨加幾句啦。
呢期ＨＩＢＯＲ急升，睇黎加Ｐ不遠了。（順手睇埋ＵＳＤ／ＨＫＤ）



不過，凡事梗係要戴定頭盔啦！

政府個六招，唔會壓到樓價（特首講明架喎！），只會令樓價進一步上升（睇下班買樓財演講乜）！

加息，只會令借錢買股，借錢抽新股，借錢買債，借錢買新手機個班仆街！！

借錢買樓係無事０既，借多Ｄ都得，雖然都係借錢，但唔好問點解喇。

下圖黎自ＩＭＯＮＥＹ，幻覺黎０既０者！



下面呢篇文一定係大淡友寫出黎嚇九人啦係咪？

＜瘋狂的磚頭 (九)：磚頭道友 與 公屋阿婆 (上集)＞

註：我唔買呢Ｄ書，不過而家專注湊小朋友／打機／睇劇，同小朋友去圖書館咪乜都睇下（我試過睇ＷＩＬＤ　ＬＩＦＥ／ＡＳＴＲＯＮＯＭＹ／ＮＡＴＩＯＮＡＬ　ＧＥＯＧＲＡＰＨＩＣ，係咁嘈０既小朋友閱讀區睇，好似格格不入，睇雞精財經書算啦！）