男主人鋪租續約了　雜記

十幾日無打過網誌，原因？成日都好早訓，皆因朝早要帶女番學。

發生０既事情都唔少，例如ＴＯＹ申請債務重組，我無沽到，又睇下有冇白武士。我買入價扣埋息都未蝕０既。我估唔會好差卦，新聞一出，以為佢跌到６０　７０　蚊，點知又唔係喎，暫時唔理佢。

人買我又買，將女主人ＲＢＳ　優先股Ｄ錢用左黎買ＣＴＢＢ。睇下今次女主人會否搭沉船。

另外，ＧＬＤ已經升到１２６美元，似乎今個月兩邊ＳＰ都會變廢紙呢，真好。

本來諗住踏入十月才搵業主傾續鋪租一事。點知上星期業主主動問續唔續。哈哈，加左８％，比我預期少左好多，咁我搬鋪或者摺０既念頭就被打消了。


咁我只需加價0.9%就可以抵銷租金上升，不過我加左３％，剩番就當額外收入吧，再者２０１８年減產，實際上唔會多左太多錢０既。

由２０１８年簽多一年半組約，咁預計２０１９年六月我就可以開結業ＰＡＲＴＹ了！

見到唔少留言話要擔心０既財自唔係真財自。其實呢，我呢一刻都可以唔撈，不過有時做人０既野，諗多幾步而已。現在呢個數目退休，已比唔少人優勝，好多人心中０既計劃係無計埋通漲０既（包括我最初都係！）。

今個星期日，再同老婆去食韓式炸雞。


即使我兩公婆繼續做，每年都係搵多二至三百萬（已扣生活支出，呢個數係齋儲），但隨住年紀增長長輩變老同小朋友長大，光陰成本遠勝金錢所得。

另，我個財自左０既外母食回頭草（而家請人難），番番最初佢唔做個間公司度做。。。今次講明唔做咁長時間，否則唔撈，係威係勢。

再另，送個女番學個陣，以為會見到屋苑其他媽媽或工人，點知見到個爸爸同我一樣帶女番學。佢問我係咪全職爸爸，原來佢係！勁呀！果然我個屋苑好多人都唔駛點做。。。風水好？哈哈。。。有機會再同佢交流下先！

今日股市又上番，建行收市＄６.８，都係個句，８蚊開始做期權，直上１０蚊就沽出即時唔撈。現時投資組合有四成係借番黎，目標希望做到三成三。


女主人兩隻油股，除淨後計埋股息，應該都番番家鄉了！